有無試過當情侶有拗撬嘅時候，而你嘅另一半又再次攞返以前啲嘢出嚟講，講番你嗰陣時(出軌/呃佢/唔尊重佢等等...)對佢帶來幾大傷害。就算件事係五年前發生都好，對於佢來講永遠就好似昨日發日一樣。
你覺得非常氣餒，認為就算你為佢改變幾多都好，佢根本就唔想忘記，亦唔會原諒你。然後你忍唔住反咗個小白眼心諗：CLS，佢又黎喇...
致仍然活在陰影嘅你：我明白回憶並唔係你特登諗起，有時係自然浮起，連自己都控制唔到。一個名、一個地方、一首歌、甚至係一個小動作，都可以立刻帶番你去案發現場。但係你亦要記住，如果你決定要走出傷痛就一定要turn the page，如果你已經話咗會原諒呢個人你就要let it go。
其實發生咗嘅嘢就已經發生咗，根本無得返轉頭。你仍然心有糾結唔能夠向前望，好大原因係因為：1. 未能真正原諒過去嘅自己，2.未能真正原諒過去嘅另一半。記住，每個人都有過去，重點係你因為過去而長大咗，成熟咗，所以你嘅過去並唔係你嘅羞恥，你只係上咗寶貴一課。同時，如果你選擇咗”每個人都有一次被原諒嘅機會”，你嘅心就要容納過去。原諒別人嘅同時，其實都係放過緊自己。怨恨過去係一個無底深潭嘅黑洞，當你不斷攞返以前嘅嘢出嚟講其實係純粹發洩你嘅情緒，對雙方關係是完全無幫助，更會令對方覺得你成日發癲最後逼走佢。真係唔好再講嗰啲”我都唔想㗎...我真係忘記唔到你嗰時咁樣對我！”嘅對白，既然你忘記唔到，或者你根本唔想忘記，咁你不如move on你離開算啦。
致仍然未被完全原諒嘅你：被人重複又重複咁提起自己瘡疤係難受嘅，我明白。當然，你送咗一埋眼淚同傷痛比你另一半，你亦有責任比時間佢去痊癒。佢原諒咗你唔代表再相信你，再次建立信任將會係你最艱巨嘅repay，需要嘅係時間同耐性。
可是，建立信任又唔等同縱容。有啲人由於覺得內疚，所以每次另一半又提番以前就立即龜縮，將啖氣狠狠吞落去，又或者忍唔住鬧番佢轉頭，最後只會令佢怨氣越積越多。其實呢個係非常唔健康嘅現象，一黎會令對方唔覺意慣用咗你嘅過失做擋箭牌(假如你只識得忍)，二黎你再咁樣落去遲早會爆(假如你真係忍唔住)，對雙方都無益處。我好建議大家坐低好好傾清楚約法三章，既然大家決定要繼續喺埋一齊，為咗下一步雙方就應該放低過去重新開始。如果對方有時情緒唔穩定想犯規，你唔應該容忍亦都唔可以發脾氣，理智咁提醒大家都要放低過去，然後再找出而家嘅問題為在。咁樣你先至係真正幫緊大家幫緊佢。
致你們：願意去理解對方嘅痛苦，會為對方唔開心而覺得難過，就係仍然愛著對方嘅證明。既然大家決心繼續走落去就要勇敢多啲減少藉口，唔好因為內疚或者怕再受傷害，以保護自己為優先。嗰個係你嘅保護殻，並唔係你真正嘅樣子，我身邊有朋友中途放棄咗對方，亦有朋友最後雙雙跑到終點。
學會放手才會得到更多，祝福你們。
#讓過去成為過去 #女人像鹽
Search